លោក កែវ រតនៈ រដ្ឋមន្ត្រីក្រសួងរ៉ែនិងថាមពលបានអះអាងថា ការទប់មិនឱ្យតម្លៃអគ្គសនីឡើងថ្លៃ ហើយបញ្ចុះតម្លៃអគ្គិសនីជូនប្រជាពលរដ្ឋ គឺជាគោលនយោបាយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងគោលបំណងកាត់បន្ថយការចំណាយរបស់ពលរដ្ឋនិងជួយសម្រួលវិស័យផ្សេងៗទៀត។
លោក កែវ រតនៈ រដ្ឋមន្ត្រីក្រសួងរ៉ែនិងថាមពល លោក កែវ រតនៈ បានអះអាងបែបនេះនៅក្នុងពេលធ្វើបាឋកថាស្ដីពី «គោលនយោបាយថាមពលកម្ពុជា» នៅសាកលវិទ្យាល័យភូមិន្ទភ្នំពេញ នារសៀលថ្ងៃទី៤ ខែតុលា ឆ្នាំ២០២៤។ លោកបានសង្កត់ធ្ងន់ថា ការខិតខំទប់ស្កាត់មិនឱ្យអគ្គិសនីឡើងថ្លៃនេះ គឺជាគោលនយោបាយសំខាន់របស់សម្ដេចធិបតី ហ៊ុន ម៉ាណែត ជាការកាត់បន្ថយការចំណាយរបស់ប្រជាពលរដ្ឋផង ហើយនឹងជួយសម្រួលផ្នែកឧស្សាហកម្ម ពាណិជ្ជកម្ម កសិកម្ម និង វិស័យពាក់ព័ន្ធផ្សេងៗទៀត។ ការទប់ស្កាត់មិនឱ្យតម្លៃអគ្គិសនីឡើងថ្លៃនេះអាចធ្វើឡើងបានក្រោមរូបភាពមិនដំឡើងថ្លៃអគ្គិសនី ពោលគឺចាប់ពីសម្ដេចធិបតីបានឡើងកាន់តំណែងជានាយករដ្ឋមន្ត្រីកម្ពុជា តម្លៃអគ្គិសនីនៅកម្ពុជាគ្មានការឡើងថ្លៃឡើយ។
លោក កែវ រតនៈ ក៏បានលើកឡើងថា ក្រោយពីវិបត្តិកូវីដ-១៩រាតត្បាតជាសកលនិងបញ្ហាសង្គ្រាមរុស្សី-អ៊ុយក្រែន តម្លៃថាមពលនៅទូទាំងពិភពលោកបានកើនឡើងជាបន្តបន្ទាប់នៅក្នុងកម្រិតតម្លៃតិច និងច្រើន ហើយគ្មានប្រទេសណាមួយចុះថ្លៃថាមពលឡើយ ចំណែកកម្ពុជាបានព្យាយាមទប់មិនឱ្យតម្លៃអគ្គិសនីកើនឡើង ដោយបានបញ្ចេញថវិការបស់រាជរដ្ឋាភិបាលតាមរយៈអគ្គិសនីកម្ពុជា៕ |
1
